好多人都投資但係咪個個都識投資？作為啱啱畢業嘅您，或者啱啱開始投資嘅新手，第一個投資建議係：定期投資。有冇搞錯？定期投資？ 我要低買高賣，一注獨贏，極速儲首期！冷靜啲～呢啲唔係話冇可能，但針冇兩頭利，佢嘅反面就係萬一睇錯市就隨時輸晒您啲血汗錢！

咁但係我定期投資，我點知個市高定低呢？我地獄黑仔王次次都高位入咪好蝕底？原來唔一定！做吓功課*您會發現，以美股嚟計就算您係地獄黑仔王，次次都股市創新高先來入市，拉長嚟睇，原來您嘅投資回報一啲都唔失禮。以一個美國分析為例，假設您由22歲開始做嘢，每年儲$2000，隨着您慢慢加人工，儲蓄額每10年加多$2000 （即係第11年開始每年儲$4000 ，好正常啦），到你65歲退休嘅時候你有幾多錢呢？

呢個分析嘅重點就係在於假設呢個地獄黑仔王平時只係會將錢擺喺定存，只有到咗每次市場大調整之前先至會入市，買完即跌，詳情唔多講你可以自己睇下面嘅研究分析，但個故事結論就係話畀您聽，就算佢地獄黑仔王到每次買完之後個市場就跌三四成，甚至一半，佢一樣可以喺退休嘅時候將投資滾存超過五倍去到$1,100,000。

地獄黑仔王嘅故事話畀我哋知咩呢？

• 第一：投資唔同投機，投資係講緊以20年計嘅嘢，而長期係重要嘅，因為長期嚟講股市大部份時候都係處於上升嘅階段。
• 第二：入市時間點係重要，但唔係絕對，因為大部份人都唔係專家，最重要係持之以恆，建立定期投資嘅習慣。
• 第三：對於唔想或唔識捕捉入市時間嘅您同我， 定期投資係王道，一啲都唔可恥，回報仲非常之見得人，足夠退休買樓 。

* Source: A Wealth of Common Sense: Why Simplicity Trumps Complexity in Any Investment Plan, Ben Carlson, 2015