請稍等。
最HIT話題

NFT點解咁HIT?解構NFT投資熱潮



今年個個都講 NFT,究竟 NFT 係咩嚟?相信有玩開社交媒體嘅朋友,都相繼見到不少名人將佢哋社交媒體帳號嘅頭像轉為一個公仔圖案,有馬騮、有兔仔、有熊仔等等多不勝數。有人話 NFT 只係一張JPG圖,唔知點解可以賣到咁高價;亦有人話靠投資 NFT 賺到第一桶金,咁係咪個個都啱投資 NFT 呢?以下就為大家講解 NFT 嘅基本概念。

NFT 究竟係咩?

NFT 全寫為 Non-Fungible Token,即「非同質化代幣」,與「同質化代幣」係一種相對嘅概念。「同質化代幣」即係大家常見嘅加密貨幣,例如比特幣 (BTC) 或者以太幣 (ETH),每一個「幣」都並無差異,擁有相同價值;相反「非同質化代幣」就係一種獨一無二嘅 Token (代幣),每一個 NFT 都唔可以互相替代,價值亦都不盡相同。此外,任何人都可以查閱 NFT 嘅擁有權歷史、Token ID、區塊鏈地址和其他相關資料,而且每個NFT嘅記錄不能被刪改,因此每個NFT出處均可驗證,所以並不能被仿冒。

NFT

聽落NFT嘅概念好似有啲抽象?不如試吓用一個日常生活中嘅例子說明:有兩對型號、顏色、尺吋都一模一樣嘅限量版波鞋,每對波鞋嘅初始定價為 $1000;但原來其中一對波鞋上面係有著名球星嘅親筆簽名,亦同時都附有一張無法被刪改或者改仿冒嘅證書,去證明球星嘅親筆簽名係真跡,以及呢對波鞋曾經由邊個擁有。因此呢對波鞋喺投資市場上就會變成「獨一無二」,價值亦有所提升,可能會由HK$1,000變成幾千、甚至幾萬蚊。

NFT會以咩形式出現?

近月睇新聞,不時都會提到某啲品牌或者名人將會發行不同種類嘅NFT。其實NFT 可以係任何數碼資產,現時最常見有以下幾款 NFT:音樂、圖像、畫作、影片、遊戲道具、遊戲角色等等。可能您會問:咁平時我玩online game嘅時候都會「擁有」不同嘅遊戲道具,咁又係唔係 NFT?現時普遍線上遊戲入面嘅道具,雖然係儲存於玩家嘅遊戲帳號入面,但其實呢個帳號以及道具都係由遊戲公司所「擁有」;若然遊戲公司將您嘅戶口修改或刪除,又或者當遊戲公司倒閉嘅時候,您嘅道具亦會化為烏有。相反, NFT 遊戲道具嘅「擁有權」就係真正屬於遊戲玩家本人,因為NFT 遊戲道具係儲存於玩家嘅數位加密錢包裡面,您可以隨時將道具與其他玩家交易,又或者將道具應用於其他區塊鏈嘅遊戲上面。

另一方面, NFT技術已經廣泛應用喺數位證書、身份認證、域名等各種行業領域,全球有好多企業同品牌都開始投放資源發展NFT技術,市場上亦陸續出現相關嘅股票、ETF等投資項目。不過NFT投資始終都比較新穎,投資前記得要做足功課,了解清楚項目內容及考慮相關風險先至作出決定。

想發掘更多理財攻略?立即加入Citi Plus!