請稍等。
理財101

盤點坊間股市傳說



今年一月,美股道瓊斯工業平均指數指數 (DJI) 全月下跌2%,好多人都會講起「一月效應」(January effect)。其實坊間一直有好多股市傳說,冥冥中好似有啲Pattern走咗出嚟,究竟係巧合定宿命?一齊睇睇:

1月效應,信不信由您?

「1月效應」(January effect)源於美股市場,普遍有兩種講法。第一種講法係指每年1月股市上升機會大過跌市,其中一個成因可能係由於美國散戶會集中喺年尾出貨,以盡量減低資產增值稅嘅繳稅水平,然後到1月份再重整投資組合入市買股,因而帶旺股市。另一種講法係指若然股市喺1月份上升,嗰一年股市嘅整體表現都會向上,相反若然1月份股市下跌,則全年表現都會受影響。睇返過去5年港股1月及全年表現,當中有3年走勢與「1月效應」吻合,似乎呢個講法,對港股而言都係只供參考。

五窮六絕七翻身,係自然現象?

「五窮六絕七翻身」係另一個成日聽到嘅股市傳說,講緊嘅係5月跌市,6月再跌多round,7月就會反彈。其實呢個現象係可以解釋:如果股市喺第一季累積咗一定升幅,大概喺5或6月左右,港股通常會出現調整,因為有部分投資者會喺上市公司派息除淨後離場,令股市短暫失去支持,直至半年結後,即大概7月重新出發,再度投入股市;另一方面,基金經理亦會喺下半年開始重新調配投資分佈,令7月股價回升,即係所謂的「七翻身」。不過睇返過去5年數據,恒指只係喺2016年應驗過呢個講法,所以散戶投資者都唔需要過分擔心。

五窮六絕七翻身係自然現象?

10月股災月,魔咒有無得破解?

唔少人都認為10月係傳統股災月,皆因過有幾次經典大跌市,往往都喺10月發生。呢個魔咒源於1987年嘅10月股災,當時美國道瓊斯工業指數突然大幅下跌超過兩成,拖累亞洲股市跟隨下挫,港股隨即宣布停市4日,成為香港史上第一次停市,而港股當年10月單月跌幅仍然達43%。到咗1997年10月,泰國放棄固定滙率制度而令泰銖急劇貶值,事件波及多個亞洲國家嘅貨幣同股票市場,拖累港股大跌三成。去到2007年,美國爆發次按危機,雷曼兄弟破產,引發2008年金融海嘯,港股喺當年10月單月跌幅22%。經過呢幾次股災之後,市場就認定「10月股災月」呢個講法。不過翻查近5年數據,只有2018年10月喺中美貿易戰影響下,恒指單月急插10.1%;2016年10月嘅跌市,恒指僅跌1.6%,呢個魔咒似乎近年有「破咒」迹象。

投資之前記得要做足功課

以上嘅股市傳說,某程度上有一定參考價值,不過要留意返股市表現都會受眾多因素影響,亦唔會有所謂嘅定律或者法則,所以做決定之前記得要做足功課。而Citi Plus作為您嘅理財好隊友,有一系列簡單易明嘅理財攻略,由淺入深level up您嘅理財知識,就算係新手都可以輕鬆上手!睇完攻略,仲有門檻較低嘅投資產品畀您實踐,少少錢就可以開始投資!快啲搵埋班friend參加「Citi Plus Team Up開戶獎賞」,一齊chill住學,玩住賺!

立即加入Citi Plus,一齊Chill住學,玩住賺更+多