「三文治世代」係指家中上有高堂或其他家庭成員、下有仔女嘅打工一族，可謂名乎其實「夾心人」。由於佢哋要照顧兩代人嘅起居生活，支出一闊三大，所以更加要做好個人理財規劃，善用唔同嘅理財技巧及竅門，以減輕日後嘅財務負擔。「三文治世代」既要養起幾代人，又要計劃自己將來嘅退休生活，理財規劃一定要多管齊下。

「三文治世代」往往要面對一定程度嘅財務壓力，皆因佢哋要負責屋企嘅日常生活開支，由最基本嘅買餸、搭車、日常消遣、子女嘅學費、雜費，到聘請「外援」包括保姆、家傭、家庭助理等額外開支，都需要一手包辦。萬一唔好彩有人意外受傷，或者出現健康問題，就會出現無法預見嘅醫療開支，增加經濟負擔，更有機會打亂本身嘅理財計劃。

要滿足醫療保健、教育、幼兒及長者護理及休閒娛樂等各項需要，長遠及持續嘅儲蓄計劃係相當重要。其中一個較為簡單嘅儲錢方法，就係將每月收入嘅若干比例，存入銀行戶口作為定額儲蓄。想為自己同屋企人做更多準備，不妨考慮額外設立一個應急基金，以應付突如其來嘅開支。

要做好理財規劃，無論係日常使費、家用抑或其他開支，都應該設立一個支出上限，例如每月或每星期嘅支出唔可以超過某個限額，從而將開支同收入嘅比例控制喺一個合適嘅水平。「三文治世代」要保持健康嘅理財，就要遵守量入為出嘅原則，同時要學識管理屋企人對物質生活嘅追求同期望；就算想氹屋企人開心，都唔一定要經常送啲貴重嘅禮物或者帶佢哋去食豪華大餐。而每位家庭成員各自都應該要學識審慎理財，控制個人支出水平，避免衝動消費，為家庭財務出一分力。

要做好家庭理財規劃，家長亦需要教育小朋友理財知識，建立正確嘅價值觀。例如可以畀小朋友了解屋企嘅日常開支，等佢哋知道點樣為合理消費；平日亦可以教育佢哋將部分零用錢儲起，幫助小朋友建立良好嘅理財習慣。如果每位家庭成員都識得未雨綢繆、審慎理財，到小朋友長大之後，自然可以輕鬆接棒，幫手分擔財務責任同照顧屋企。